Afrika qit’asining sharqida, Hind okeanida joylashgan xushhavo va xushmanzara Seyshel oroli poytaxti Viktoriya shahri may oyining dastlabki yarmida sohil futboli muxlislari diqqat markazida turdi. 155 ta orollar arxipelagining ajralmas bu qismi sohil futboli bo‘yicha XIII jahon chempionati final bosqichiga mezbonlik qildi.
Sayyoramizning 16 kuchli terma jamoasi ishtirok etgan Mundialda charm to‘p sehrgarlari yurti – Braziliya terma jamoasi yettinchi marta jahon chempioni degan sharafli nomga sazovor bo‘ldi. Braziliyaliklar finalda Belarus terma jamoasini 4:3 hisobida mag‘lubiyatga uchratdi. Kumush medallardan tashqari bronza medallari ham Yevropa qit’asi vakillarida ketdi. 3-o‘rin uchun o‘tkazilgan uchrashuvda Portugaliya terma jamoasi Afrika qit’asi vakili – Senegal terma jamoasini 3:2 hisobida dog‘da qoldirdi.
E’tiborga molik jihati sohil futboli bo‘yicha mazkur jahon chempionatida o‘zbek o‘g‘loni, taniqli FIFA referisi Nayim Qosimov ham faoliyat olib bordi. Nayim Qosimov 11 kun ichida 9 ta bahsda faoliyat yuritgani diqqatga sazovor. Xalqaro futbol federasiyalari uyushmasi hakamlar qo‘mitasi Nayim Qosimovga guruh bahslarining bittasini (Salvador – Italiya – 0:5) boshqarish, shuningdek, beshtasida bosh hakam yordamchisi sifatida ishlash imkoniyatini berdi.
O‘zbekistonlik referi Jahon chempionatining oxirgi kuniga qadar uchrashuvlarni boshqarishga jalb etildi. Jumladan, 8 may kuni pley-offning dastlabki bosqichi – chorak finalda Belarus – Eron (4:3), 10 may sanasida esa yarim finalning Portugaliya – Braziliya terma jamoalari uchrashuvlarida bosh hakam yordamchisi vazifasini o‘tadi. Va nihoyat Mundialning oxirgi kuni Nayim Qosimov Senegal – Portugaliya (2:3) terma jamoalari o‘rtasida kechgan 3-o‘rin uchun o‘yinda ham bosh hakam yordamchisi sifatida maydonga chiqdi.