Germaniya kansleri nomzodi, Xristian-demokratik ittifoq yetakchisi Fridrix Merz Ukraina uchun nemis qurollaridan foydalanishga qo‘yilgan cheklovlarni bekor qilmoqchi. Bu haqda u ARD telekanalida aytib o‘tdi.
Siyosatchining qayd etishicha, Ukraina hozirda Rossiya bilan mojaroga barham berish uchun yetarlicha kuchga ega emas.
“Biz raketa masofasidagi cheklovlarni olib tashlashimiz kerak, toki Ukraina haqiqatan ham Rossiyaning harbiy hujumlaridan o‘zini himoya qila oladi”, — dedi Merz.
Bundan tashqari, Merz Germaniyaning amaldagi kansleri Olaf Scholzdan farqli o'laroq, Ukrainaga Germaniyaning uzoq masofali Taurus raketalarini yetkazib berishni qo'llab-quvvatlaydi.
Avvalroq Germaniya kansleri lavozimiga o‘ng qanot “Germaniya uchun muqobil” (AfD) partiyasidan yana bir nomzod Elis Vaydel Ukraina uchun tinchlik va Kiyevga qurol yetkazib berishni to‘xtatishni xohlayotganini aytgan edi. Uning ta'kidlashicha, partiya Ukrainaga «Taurus» raketalarini yetkazib berishni istamaydi, bu esa «Germaniyani urush ishtirokchisiga aylantiradi».