Prezident Shavkat Mirziyoyev 10-sentabr kuni Toshkent shahrining Yangi O‘zbekiston ko‘chasida amalga oshirilayotgan qurilish va obodonlashtirish loyihalari bilan tanishdi.
Uzunligi 11 kilometr, eni 86 metr bo‘lgan ushbu ko‘cha keyingi yillarda eng yirik ko‘chalardan biriga aylandi. Shaharning kengayishi va Toshkent viloyatining sayyohlik salohiyatiga qaraganda, uning kelajagi ham istiqbolli.
Shu bois davlatimiz rahbarining 2022-yil 30-iyundagi qarori asosida Yangi O‘zbekiston ko‘chasida savdo majmuasi qurish va bu yo‘lda infratuzilmani rivojlantirishga qaror qilindi. Shunga ko‘ra, direktorlar kengashi tuzilib, arxitektura g‘oyalari ishlab chiqildi.
Loyihaga ko‘ra, yo‘lning ikki tomonida milliy ruhga hamohang zamonaviy turar-joy massivlari, mehmonxonalar, savdo majmualari va xizmat ko‘rsatish shoxobchalari barpo etiladi. Istirohat bog‘lari va dam olish maskanlari, piyodalar va velosiped yo‘llari tashkil etiladi.
Ma’lumki, bu yerda “Toshkent-Sharqiy” aeroporti va Olimpiya shaharchasi ham barpo etilmoqda. Prezidentimiz mazkur inshootlar atrofidagi atrof-muhit va ularga olib boruvchi yo‘llarni ko‘kalamzorlashtirish bo‘yicha ko‘rsatmalar berdi.
Mazkur tashrif davomida bu boradagi landshaft dizayni bo‘yicha takliflar ko‘rib chiqildi. Unga ko‘ra, Yangi O‘zbekiston yo‘lining ikki tomoni obodonlashtiriladi. Manzarali oʻsimlik sifatida chinor, eman, lola, katalpa, pisardiya, sarv, hind nastarini, lavanda, suriya atirgul kabi daraxt va butalar oʻstiriladi. Aeroport oldida ikkita favvora o‘rnatiladi. Umuman olganda, bu hudud Toshkentning “yashil belbog‘i”ga kiradi.
Davlatimiz rahbari obodonlashtirish bo‘yicha o‘z tavsiyalarini bildirdi. Bu yerda ekologiya, sifat va madaniyat uyg‘unlashishi kerakligini ta’kidladi.